За блогийн таньдаг болоод таньдаггүй бүх найзууддаа хожимдсон ч гэсэн шинэ оний мэнд хүргэе.

Ойрд нээж хараагүй энэ муу блогийн хуудаснууд маань жаахан гандаа юу даа. Өнөөдрөөс эхлээд өдөр бүр нээж салхи оруулж байх болохоор өнгө зүс нэмнэ гэж найдхаас.
     Би нэг их сүрхий салах ёс энэ тэр болоод л, ажилдаа улайраад л байсан хирнээ 2010 онд тавьсан зорилгоо биелүүлж чадсангүй ээ. Гэхдээ яахав бас ч зүгээр суугаагүй дээ гэж голоо зогоож байна. Ямартай ч өнгөрдөг жилд ер нь юу хийв, юуг онов, юун дээр алдав гээд дүгнээд нэг бичмээр санагдлаа.Хийсэн зүйлс:

1. Албан тушаалын дагуу оноогдсон ажил үүргээ боломжийн сайн хийж гүйцэтгэсэн.
2. Багш нарыхаан хамтаар "Материалын эсэргүүцэл хичээлийг U хэлбэрт оруулах боломжийн судалгаа" төсөл дээр гол гүйцэтгэгчээр гардан ажиллаа.
3. Хэлний мэдлэгээ тодорхой хэмжээнд дээшлүүллээ.
4. Сайхан боломж тохиож харь оронд суралцах боломж олж авлаа.
5. Сайхан эхнэр, хөөрхөн охин, хайртай гэр бүлтэйгээ хэсэгхэн хугацаанд ч болов сайхан амарлаа.
6. Анх удаа хилийн дээс алхаж намрын нэг өглөө Инчоны олон улсын нисэх буудалд газардлаа.
7. Шинэ хамт олонтой болж шинэ газар, шинэ уур амьсгал, шинэ сургалтын системд даслаа.
8. Мэргэжлийн дагуу 3 хичээл сонгож чадлыхаан хирээр хичээж үзлээ.
9. Шинжлэх ухааны хөгжил, эрдэм шинжилгээний өгүүлэл, судалгааны ажил хийх арга барил гэх мэт цаашид зайлшгүй хэрэгцээтэй зүйлсийн талаар бага ч болов мэдлэгтэй боллоо.
10. . . . . . /Энэ талаар дараа хэлнэ ээ/.

• Амьдралын шинэ хуудас эхэллээ!!!

1. Нэгэнт эхлүүлсэн төслийн ажлаа эцсийн цэгийг нь тавьж чадалгүй орхиод ирсэндээ харамсаж байна.
2. Сурах зайлшгүй шаардлага байсаар байтал хэлний мэдлэгээ хангаллтай түвшинд хүртэл дээшлүүлж чадаагүй.
3. Хайртай эхнэр, энхрий үртэйгээ наадмын хэдхэн өдөр л тухтай хамт байсан даа одоо хүртэл харамсаж байна. Охин минь аав нь чамайгаа ямар их санаж байгааг чи мэддэг ч болоосой /Энэ тэмдэглэлийг үр минь чи хэзээ нэгэн цагт олж унших биз дээ/.
4. Ахиад жаахан л хичээсэн бол хичээлүүдээс авах дүн минь арай дээр байж болхоор байлаа.
5. "2010 онд багтааж 1 ширхэг олон улсын хэмжээний эрдэм шинжилгээний өгүүлэл бичнэ" гэсэн хамгийн гол зорилгодоо хүрч чадсангүй.

За за хийсэн ажлаа товчхон дүгнэхэд ийм байна даа. Ямартай ч миний хувьд 2010 он шинэ шинэ зүйлсээр дүүрэн уйдах нь бүү хэл амрах завгүй сайхан жил болж өнгөрчээ. Өөрийхөө хэмжээнд гаргасан амжилт ололт бүрийн минь ард туслаж дэмжиж, зааж сургаж байсан хайртай эхнэр, эцэг эх, ах эгч, сайхан найзууд, эрдэмт багш нэр гээд миний төлөө байсан, надад сайхан сэтгэлээр хандаж өчүүхэн ч атугай тус дэм хүргэсэн бүх хүнд талархал илэрхийлье. Та нар дунд надад тус хүргэснээ юман чинээ бодоогүй, бүр мэдээ ч үгүй хүн ч бас байгаа л байх. Ямар ч байсан та бүгдийн тусыг марталгүй санаж чадлыхаан хирээр хариулах болно оо.